What Is the Last Judgment?

John XXIII: key points in the life of 'The Good Pope'

Seven key-points that made John Paul II 'The Great Pope'

7 July 2013, 14th Sunday in Ordinary Time C

Sál ke daurán chaudhwán Itwár (C)

Dákhilah (Entrance Antiphon):

 (Zabúr) Cf. Ps 47: 10-11

Ai Khudá terí haikal ke andar terí shafaqat ko yád karte hain. Ai Khudá tere nám kí mánind terí ta‘rif bhí zamín kí intihá tak pahunchtí hai.

Jamá‘atí Du‘á (Collect):

Ai Piyáre Khudá

Tú ne girí húí khalqat ko

Apne Beṭe kí farotaní ke zarí‘e phir uṭháyá

Apne ímándáron ko yih pák shádmání ‘atá kar

Ki wuh gunáh kí g̣hulámí se raháí pá kar

Hamesha kí zindagí ká lutf uṭháen

Masíh hamáre Khudáwand ke wasíle se, jo tere sáth

Rúhu’l Quds kí wahdáníyat men Khudá hai

Aur hamesha se hamesha tak zinda rahtá aur sultanat kartá hai. Ámín.

Readings

Pahlí Tiláwat: 

(Isha‘yá nabí ká sahífa) Isaiah 66:10-14

Dekho! Main salámatí ko daryá kí mánind us kí taraf rawán karúngá

Khudáwand farmátá hai

Yarúshalem ke sáth khushí karo,

aur us ke sáth shádmán ho tum sab jo us se muhabbat rakhte ho.

Us ke sáth baṛí shádmání karo,

tum sab jo us par nauhah karte ho.

Táki tum chúso,

aur us ke tasallí-dih pistánon se ser ho,

aur dúdh doho,

aur us kí sarwat ke pistánon se hazz uṭháo,

kyúnki Khudáwand yún farmátá hai dekh,

main salámatí ko daryá kí mánind,

aur qaumon kí shaukat ko labrez nadí kí tarah

us kí taraf rawán karúngá.

Tab tum chúsoge,

aur god men uṭháe jáoge,

aur ghuṭnon par tum se láḍ kiyá jáegá.

Us kí tarah jis kí mán use tasallí detí hai.

waise hí main tumhen tasallí dúngá,

aur Yarúshalem men tum tasallí páoge,

aur tum dekhoge, aur tumhárá dil khush hogá,

 aur tumhárí haḍḍiyán ghás kí mánind phúṭengí,

aur Khudáwand ká háth us ke bandon par záhir hogá,

aur apne dushmanon par g̣hazab-nák hogá.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Zabúr: Psalm 65:1-7. 16. 20 Jamá‘ati jawáb áyat: 1

Jamá‘ati jawáb: Ai kul mamálik Khudá ke liye Khushí ká na‘ra máro

Ai kul mamálik Khudá ke liye Khushí ká na‘ra máro

Us ke nám ke jalál ká gít gáo

Us ke liye ek shándár tarána-e hamd pesh karo

Khudá se kaho ki tere kám kyá hí muhíb hain

  Ai kul mamálik Khudá ke liye Khushí ká na‘ra máro

Tamám zamín tujhe sijda kare, aur terá gít gáe

Tere nám ká gít gáe [Siláh]

Á kar Khudá ke kámon ko dekho

Baní nau‘ insán ke darmiyán us ne muhíb kám kiye hain

  Ai kul mamálik Khudá ke liye Khushí ká na‘ra máro

Us ne samundar ko khushkí baná diyá hai

Unhon ne daryá ko paidal ‘ubúr kiyá

Is liye áo ham us men khushí manáen

Wuh apní qudrat se abad tak hukmrán hai

  Ai kul mamálik Khudá ke liye Khushí ká na‘ra máro

Tum sab jo Khudá se ḍarte ho á kar suno

Main tumhen batáúngá ki us ne mere liye kyá kyá kiyá hai!

Khudá mubárak ho, jis ne na to merí du‘á ko radd kiyá

Aur na apní shafqat hí ko mujh se báz rakkhá

  Ai kul mamálik Khudá ke liye Khushí ká na‘ra máro

Dusrí Tiláwat:

(Muqaddas Paulus Rasúl Ká Khatt Galátíon ke nám) Gal 6:14-18

Mere badan par Yisú‘ ke nishán lage húe hain

Ai bháiyo! Khudá na kare, ki main kisí aur chíz par fakhr karún siwá hamáre Khudáwand Yisú‘ Masíh kí salíb ke, jis se duniyá merí nisbat maslúb húi, aur main duniyá kí nisbat. Kyúnki na khatna kuchh chíz hai na námakhtúní, magar makhlúq-i-nau honá, aur jitne is qá‘ide par chalen, unhen aur Khudá ke Isráíl ko salámatí aur rahm hásil ho. Áge ko koí mujhe taklíf na de, kyúnki mere badan par Yisú‘ ke nishán lage húe hain.

Ai bháiyo! Hamáre Khudáwand Yisú‘ Masíh ká fazl tumhárí rúh ke sáth rahe. Ámín.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Gospel Acclamation

Hallelujah: (Yúhanná) Jn 15:15

Hallelujah Hallelujah 

Khudáwand farmátá hai main tumhen dost kahtá hún

kyúnki jo báten main ne apne Báp se suní hain

wuh sab tumhen batá dí hain

Hallelujah 

Yá

Hallelujah: (Kulussíon) Col 3:15.16

Hallelujah Hallelujah

Masíh kí salámatí

tumháre dilon par hukumat kare,

jis ke liye tum bhí ek badan ho kar buláe gaye ho. 

Hallelujah

Injíl I Muqaddas:

(Muqaddas Lúqá ke mutábiq) Luke 10:1-12, 17-20

Tumhárá salám us par ṭhahregá

Us waqt Khudáwand ne bahattar aur muqarrar kiye, aur unhen do do kar ke har shahr aur gánw ko apne áge bhejá jahán wuh khúd jáne ko thá. Aur wuh un se kahtá thá, ki Fasl to bahut hai, par mazdúr thoṛe hain. Is liye Fasl ke málik kí minnat karo, ki wuh apní Fasl káṭne ke liye mazdúr bhej de. Jáo; dekho, main tumhen jaise barron ko bheṛiyon ke darmiyan bhejtá hún. Na baṭwá le jáo, na thailí, na jútí; aur ráh men kisí ko salám na karo. Aur jis kisí ghar men dákhil ho, pahle kaho, ki is ghar ko salám. Agar salám ká farzand wahán ho, to tumhárá salám us par ṭhahregá, warna tum par lauṭ áegá. Aur usí ghar men raho, aur jo kuchh un ke pás ho kháo aur piyo; kyúnki mazdúr apní mazdúrí ká haqqdár hai. Ghar ghar na phiro. Aur jis kisí shahr men dákhil ho, aur jahán tumhen qubúl kiyá jáe, to jo kuchh tumháre sámne rakkhá jáe, kháo; aur wahán ke bímáron ko shifá do, aur un se kaho, ki Khudá kí bádsháhí tumháre nazdík á pahunchí hai. Lekin jis kisí shahr men tum dákhil ho, jahán tumhen qubúl na kiyá jáe, wahán ke chaukon par já kar kaho ki, ham is gard ko bhí, jo tumháre shahr se hamáre pánwon par paṛí hai, tum par jháṛ dete hain, magar yih jáno, ki Khudá kí bádsháhí nazdík á pahunchí hai. Main tum se kahtá hún, ki Sadúm ká hál us shahr kí nisbat ziyáda qábil i bardásht hogá.

Aur wuh bahattar khush ho kar wápas áe, aur kahne lage: Ai Khudáwand tere nám se badrúhen bhí hamáre tábi‘ hain. Tab us ne un se kahá: Main ne shaitán ko bijlí kí ḿanid ásmán se girte húe dekhá. Dekho, main ne tumhen sánpon aur bichchhúon ke raundne, aur dushman kí sárí qudrat par ikhtiyár diyá  hai; aur tumhen kisí chíz se zarar na pahunchegá. Tá ham is se khush na ho, ki rúhen tumháre tábi‘ hain; balki is se khush ho, ki tumháre nám ásmán par likhe húe hain.

Injíl I Muqaddas ke wasíle se hamárí khatáen mu‘áf kí jáen.

Jamá‘at: Ai Masíh, terí sitáish ho.

Shorter: (Muqaddas Lúqá ke mutábiq) Luke 10:1-9

Tumhárá salám us par ṭhahregá

Us waqt Khudáwand ne bahattar aur muqarrar kiye, aur unhen do do kar ke har shahr aur gánw ko apne áge bhejá jahán wuh khúd jáne ko thá. Aur wuh un se kahtá thá, ki Fasl to bahut hai, par mazdúr thoṛe hain. Is liye Fasl ke málik kí minnat karo, ki wuh apní Fasl káṭne ke liye mazdúr bhej de. Jáo; dekho, main tumhen jaise barron ko bheṛiyon ke darmiyan bhejtá hún. Na baṭwá le jáo, na thailí, na jútí; aur ráh men kisí ko salám na karo. Aur jis kisí ghar men dákhil ho, pahle kaho, ki is ghar ko salám. Agar salám ká farzand wahán ho, to tumhárá salám us par ṭhahregá, warna tum par lauṭ áegá. Aur usí ghar men raho, aur jo kuchh un ke pás ho kháo aur piyo; kyúnki mazdúr apní mazdúrí ká haqqdár hai. Ghar ghar na phiro. Aur jis kisí shahr men dákhil ho, aur jahán tumhen qubúl kiyá jáe, to jo kuchh tumháre sámne rakkhá jáe, kháo; aur wahán ke bímáron ko shifá do, aur un se kaho, ki Khudá kí bádsháhí tumháre nazdík á pahunchí hai.

Injíl I Muqaddas ke wasíle se hamárí khatáen mu‘áf kí jáen.

Jamá‘at: Ai Masíh, terí sitáish ho.

Nazránon par Du‘á (Prayer over the Offerings)

Ai Khudáwand hamáre Khudá

Yih nazrána tere pák nám par pesh kiyá já rahá hai

‘atá kar ki yih hamen pákízagí diláe

Aur ham is ke asar se

Rúhání zindagí par ‘amal karne kí taraf

Roz bar roz ziyáda máil hote jáen

Masíh hamáre Khudáwand ke wasíle se. Ámín.

Pák Sharákat kí áyat (Communion Antiphon):

 (Zabúr) Ps 33: 9

Chakho aur dekho Khudáwand kaisá bhalá hai, mubárak hai wuh ádmí jo us kí panáh letá hai.

Or

(Matí) Mt 11: 28

Khudá farmátá hai ki, ai sab thake mándo, aur bojh se dabe húe mere pás áo, main tumhen árám dúngá.

Pák Sharákat ke ba‘d kí Du‘á (Prayer after Communion)

Ai Khudáwand hamáre Khudá

‘ináyat kar ki ham itní baṛí ni‘maton se ásúda ho kar

Terí naját dene wálí bakhshishen páen

Aur terí hamd karte rahen

Masíh hamáre Khudáwand ke wasíle se. Ámín.

…

Podcast:

For Sermon by Fr. Robert Barron click here

For reflection by Dr. Scott Hahn click here

Some great resources for Sunday Mass, Ordinary and Extraordinary Forms of the Rite at The Divine Lamp click here

Holy Mass in Urdu on Sunday, 7 July 2013

14th Sunday in Ordinary Time 

(Sál ke daurán chaudhwán Itwár)

Christ Church, Carr Rd, Nelson BB9 7EN

Sunday, 2nd June 2013
Time: 3 pm

View Larger Map

The Mass is followed by the sharing of a meal together. Everyone is welcome.

Holy Mass in Urdu every first Sunday of the month at 3pm

30 June 2013, 13th Sunday in Ordinary Time C

Sál ke daurán terahwán Itwár (C)

Dákhilah (Entrance Antiphon):

(Zabúr) Psalm 46: 2

Ai sab qaumo táliyán bajáo. Khudá ke liye khushí kí áwáz se lalkáro.

Jamá‘atí Du‘á (Collect):

Ai karím Khudá

Tú cháhtá hai ki ham fazl pá kar núr ke farzand banen

‘atá kar ki khatá aur g̣halatí ham par g̣hálib na áe

Balki ham hamesha haq kí maihak se numáyán rahen

Masíh hamáre Khudáwand ke wasíle se jo tere sáth

Rúhu’l Quds kí wahdáníyat men Khudá hai

Aur hamesha se hamesha tak zinda rahtá aur sultanat kartá hai. Ámín.

Readings

Pahlí Tiláwat: (Mulúk kí pahlí kitáb) 1 Kings 19:16. 19-21

Ilísah uṭhá, aur Iliyás ke sáth chalá gayá.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Zabúr: Psalm 15:1-2.5 7-11 Jamá‘ati jawáb áyat: 5

Jamá‘ati jawáb: Ai Khudáwand tú merá bakhrá hai.

         

Dusrí Tiláwat: (Muqaddas Paulus Rasúl Ká Khatt Galátíon ke nám) Gal 5:1, 13-18

Tum ázádí ke liye buláe gaye the.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

         

(Gospel Acclamation):

Hallelujah: (Samúel) 1 Samuel 3:9, (Yúhanná) John 6:69

Hallelujah, Hallelujah

Ai Khudáwand farmá, terá banda suntá hai

Hamesha kí zindagí kí báten to tere hí pás hain

Hallelujah

Injíl I Muqaddas:

(Muqaddas Lúqá ke mutábiq) Luke 9:51-62

Yisú‘ ne irádatan Yarúshalem ká rukh kiyá. Jahán kahín tú jáe, main tere píchhe chalúngá.

Us waqt jabYisú‘ ke su‘úd ke din qaríb the, to us ne pukhtah irádah kiyá ki Yarúshalem ká rukh kare. Aur apne áge qásid bheje, aur wuh já kar Sámaríon ke ek gánw men dákhil húe, táki us ke liye taiyárí karen. Lekin unhon ne use qabúl na kiyá, kyúnki us ká rukh Yarúshalem jáne ká thá. Us ke shágird Ya‘qúb aur Yúhanná ne yih dekh kar kahá, ki ai Khudáwand, kyá tú cháhtá hai ki ham hukm den ki ásmán se ág utre aur unhen bhasam kare? Tab us ne muṛ kar unhen jhiṛká [aur kahá tum nahín jánte ki tum kis rúh ke ho. Ibn i Insán insánon kí ján halák karne nahín, balki bacháne áyá hai] tab wuh dúsre qasbah ko chale gaye.

  Aur jab wuh ráh men chale játe the, to kisí ne us se kahá: Ai Khudáwand, Jahán kahín tú játá hai, main tere píchhe chalúngá. Yisú‘ ne us kahá: Lomṛiyon ke liye mánden hain, aur parindon ke liye ghonsle; magar Ibn i Insán ke liye itní jagah bhí nahín, jahán sir rakkhe.

  Aur us ne kisí aur se kahá, ki mere píchhe ho le. Us ne kahá: Ai Khudáwand, mujhe rukhsat de, ki pahle já kar apne báp ko dafn karún. Yisú‘ ne us se kahá: Murdon ko apne murde dafn karne de, magar tú já aur Khudá kí bádsháhí kí bishárat de.

  Ek aur ne kahá, ki ai Khudáwand main tere píchhe ho lúngá, magar mujhe ijázat de, ki pahle gharwálon se rukhsat ho áún. Yisú‘ ne us se kahá, ki jo koí apná háth hal par rakkh kar píchhe dekhtá hai, wuh Khudá kí bádsháhí ke láiq nahín.

Injíl I Muqaddas ke wasíle se hamárí khatáen mu‘áf kí jáen.

Jamá‘at: Ai Masíh, terí sitáish ho.

Nazránon par Du‘á (Prayer over the Offerings)

Ai mihrbán Khudá

Tú apne pák sákráminṭon ke zarí‘e muassir taur par kám kartá hai

‘ináyat kar ki hamárí khidmat guzárí aur ‘ibádat

Terí pák ni‘maton ke mutábiq hon

Masíh hamáre Khudáwand ke wasíle se. Ámín.

Pák Sharákat kí áyat (Communion Antiphon):

(Zabúr) cf. Ps 102: 1

Merí ján Khudáwand ko Mubarak kah aur jo kuchh mujh men hai us ke quddús nám ko mubárak kahe.

Yá

(Yúhanná) cf. John 17: 20-21

Khudáwand ne du‘á kí aur kahá ki, ai Báp main in ke liye ‘arz kartá hún

Táki wuh ham men ek hon, aur duniyá ímán láe ki tú ne mujhe bhejá hai.

Pák Sharákat ke ba‘d kí Du‘á (Prayer after Communion)

Ai Khudáwand hamáre Khudá

Ham tujh se minnat karte hain

Bakhsh de ki

Jo Iláhí Qurbání ham ne nazr kí hai

Aur jis men ham ne shirkat kí hai

Wuh hamen zindagí diláe

Táki ham páedárí mahabbat rakh kar tujh se milte rahen

Aur na saṛne wálá phal láyá karen

Masíh hamáre Khudáwand ke wasíle se. Ámín.

…

Podcast:

For Sermon by Fr. Robert Barron click here

For reflection by Dr. Scott Hahn click here

For commentary by Dr. John Bergsma on Sunday readings check out the Sacred Page click here

Some great resources for Sunday Mass, Ordinary and Extraordinary Forms of the Rite at The Divine Lamp click here

30th June 2013, Ss Peter and Paul, Apostles

29 June 2013 (USA) 30^th June 2013 (UK) Solemnity of Ss. Peter and Paul

Muqaddasín Patras aur Paulus Rasúlon kí ‘Id

مُقدّسِین پطرس اَور  پَولُوس رسوُلوں کی عید

‘Íd kí Eukharistí ‘Ibádat

Dákhilah (Entrance Antiphon):

Yih wuhí hain jinhon ne is fání duniyá men rah kar

apne khún se kalísiyá ki bunyád ḍálí

unhon ne Khudáwand Masíh ká piyála chakhá

aur Khudá ke piyáre bane.

Jamá‘atí Du‘á (Collect):

Ai Mihrbán Khudá

Tú Muqaddas Patras aur Paulus ke ‘Íd ke mauqa‘ par

Hamen láiq aur muqaddas khushí manáne detá hai

Apní Kalísiyá ko yih ‘ináyat kar ki jin kí ma‘rifat hamáre mazhab ne ágház páyá hai

Ham har bát men un kí hidáyat ke páband rahen

Masíh hamáre Khudáwand ke wasíle se jo tere sáth

Rúhu’l Quds kí wahdáníyat men Khudá hai

Aur hamesha se hamesha tak zinda rahtá aur sultanat kartá hai. Ámín.

Readings

Pahlí Tiláwat:  

(Rasúlon ke A‘mál) Acts 12:1-11

Ab main ne yaqínan ján liyá ki Khudá ne mujhe herodís ke háth se chhuṛáyá hai.

Unhí dinon men Herodís bádsháh ne Kalísiyá men se ba‘z par háth ḍálátá, ki unhen satáe, aur Yúhanná ke bháí Ya‘qúb ko talwár se már ḍálá.

Aur jab dekhá, ki yih bát Yahúdíon ko pasand áí hai, to Patras ko bhí giriftár kar liyá (Yih ‘Íd-i-Fatír ke din the). Aur pakaṛ kar qaid-khane men ḍalá, aur chár chár sipáhíon ke chár pahron kí nigahbání men rakkhá, is maqsad se ki ‘Íd-i-Fasah ke ba‘d use logon ke sámne pesh kare. Pas qaid-khane men to Patras kí nigahbání ho rahí thi: magar kalísiyá us ke liye bilá waqfah Khudá se du‘á kar rahí thí. Aur jab Herodís use pesh karne ko thá to usí rát Patras do zanjíron se bandhá húá, aur do sipáhíon ke darmiyán so rahá thá, aur pahredár darwáze par qaid-khane kí nigahbání kar rahe the. Aur dekho, Khudáwand ká ek firishta á khaṛá húá, aur us koṭhṛí men raushní chamakí, aur us ne Patras kí paslí par háth már kar use jagáyá aur kahá, ki jald uṭh. Tab zanjíren us ke háthon se gir paṛín. Aur us firishte ne us se kahá, ki kamar bándh, aur apní jútí pahin. Us ne aisá hí kiyá. Phir us ne us se kahá, Apná chog̣hah pahin, aur mere píchhe ho le. Wuh nikal kar us ke píchhe ho liyá; magar na jáná, ki yih jo kuchh firishte kí taraf se ho rahá hai, wuh wáqa‘í hai, balki yih samjhá, ki main royá dekh rahá hún. Tab wuh pahle aur dúsre paihre men se nikal kar, lohe ke us pháṭak tak pahunche, jo shahr kí taraf hai; wuh khúd ba-khúd un ke liye khul gayá, pas wuh nikal kar kúche ke sire tak gaye, aur fauran firishta us ke pás se g̣háib ho gayá. Tab Patras ne hosh men á kar kahá, Ab main yaqínan jántá hún, ki Khudáwand ne apná firishta bhejá hai, aur mujhe Herodís ke hath se chhuṛáyá hai, aur Yahúdí qaum kí sárí ummed khám kar dí hai.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Zabúr:

(Zabúr) Psalm 33:2-9 Jamá‘ati jawáb áyat: 8

Jamá‘ati jawáb:

Khudáwand ká farishta un ko chhuṛátá hai, jo us se ḍarte hain.

Main Khudáwand ko har waqt mubárak kahúngá

Us kí hamd hamesha mere munh men rahegí

Merí ján Khudáwand par fakhr kare

G̣haríb yih sun kar khushí manáen

  Khudáwand ká farishta un ko chhuṛátá hai, jo us se ḍarte hain.

Mere sáth mil kar Khudáwand kí ta‘zím karo

Ham mil kar us ke nám kí tamjíd karen

Main Khudáwand ká tálib húá, aur us ne merí sun lí

Aur us ne mujhe har khauf se chhuṛáyá

  Khudáwand ká farishta un ko chhuṛátá hai, jo us se ḍarte hain.

Tum us kí taraf nigáh karo táki munawwar ho jáo

Aur tumháre chihre par  sharmindagí na áe

Dekh maskín ne duháí dí, to Khudáwand ne sun lí

Aur us kí sab masá’ib se use chhuṛáyá

  Khudáwand ká farishta un ko chhuṛátá hai, jo us se ḍarte hain.

Khudáwand ká farishta un kí cháron taraf

Khaimazan ho kar unhen chhuṛátá hai, jo us se ḍarte hain.

Chakho aur dekho ki Khudáwand kaisá bhalá hai

Mubárak hai wuh ádmí jo us kí panáh letá hai

  Khudáwand ká farishta un ko chhuṛátá hai, jo us se ḍarte hain.

Dusrí Tiláwat:

(Muqaddas  Paulus Rasúl ká dúsrá khatt Timutáús ke nám) 2 Timothy 4:6-8,17-18

Ab sadáqat ká táj mere liye rakkhá húá hai

Ai bháiyo, main ab tapáwan kí tarah baháyá já rahá hún, aur merí rawángí ká waqt á pahunchá hai.  Main achhhí laṛáí laṛ chuká hún, main ne dauṛ ko khatm kar liyá hai, main ne ímán ko sanbhále rakkhá hai. Ab se sadáqat ká táj mere liye rakkhá húá hai, jise Khudáwand jo ‘ádil munsif hai, us din mujhe degá, aur faqat mujhe nahín, balki un sab ko bhí, jo us kí ámad ke árzúmand hain.

  Magar Khudáwand mere sáth rahá, aur us ne mujhe mazbútí bakhshí, ki  merí ma‘rifat munádí púrí ho jáe, aur sab g̣hair qaumen sun len. Aur main sher ke munh se chhuṛáyá gayá. Khudawand mujhe har bure kám se chhuṛáegá, aur apní ásmání bádsháhí ke liye maihfúz rakkhegá, abadu’l ábád tak us kí tamjíd hotí rahe. Ámín.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Hallelujah: (Matí) Mt16:18

Hallelujah, Hallelujah,

Tú Patras hai

aur is chatán par main apní kalísiyá banáúngá

aur ‘álam i asfal ke darwáze us par ghálib na áenge

Hallelujah

Injíl I Muqaddas:

(Muqaddas Matí ke mutábiq) Matthew 16:13-19

Tú Patras hai aur main ásmán kí bádsháhí kí kunjiyán tujhe dúngá

Jab Yisú‘ Qaisariya Filippí ke ‘iláqe men áyá, to us ne apne shágirdon se yih púchhá, ki log Ibn-i-Insán ko kyá kahte hain?  Unhon ne kahá, ki ba‘z Yúhanná Istibág̣hí kahte hain, ba‘z Iliyás, ba‘z Irmiyá yá ambiyá men se koí. Us ne un se kahá, magar tum mujhe kyá kahte hó.  Shama‘ún Patras ne jawáb men kahá, ki tú Al-Masíh hai, zinda Khudá ká Beṭá. To Yisú‘ ne jawáb men us se kahá, mubárak hai tú Shama‘ún BarYoná, Kyunki yih bát jism aur khún ne nahín, balki mere Báp ne jo ásmán par hai, tujh par záhir kí hai, aur main tujh se kahtá hún, ki tú Kefá hai aur main is Kefá par apní Kalísiyá banáúngá, aur ‘álam i asfal ke darwáze is par g̣hálib na áenge, aur  main ásmán kí bádsháhí kí kunjiyán tujhe dúngá, aur jo kuchh tú zamín par bándhegá, wuh ásmán par bándhá rahegá, aur jo kuchh tú zamín par kholegá, wuh ásmán par khulá rahegá.

Injíl I Muqaddas ke wasíle se hamárí khatáen mu‘áf kí jáen.

Jamá‘at: Ai Masíh, terí sitáish ho.

Nazránon par Du‘á (Prayer over the Offerings)

Ai Khudáwand hamáre Khudá

Bakhsh de ki Muqaddas Rasúlon Patras aur Paulus kí du‘áen

Is qurbání ke sáth hon, jo ham tere nám par chaṛháne ko hain

Táki ham yih Pák ‘ibádat wájib ‘aqídat ke sáth

‘amal men lá saken

Masíh hamáre Khudáwand ke wasíle se. Ámín.

Tamhídí hamd (Preface)

Yih wáqa‘i wájib aur niháyat munásib hai,

Ai Quddús Báp,

Ki ham har waqt aur har jagah terá shukr adá karen

Terí mihrbání se mubárak Patras aur Paulus

Donon hí Rasúl hamáre liye masarrat aur fakhr ká bá‘is hain

Ek ímán ke iqrár men hamárá hádí hai aur

Dúsrá ímán ke usúlon ká khol kar bayán karnewálá

Ek ne qadím ummat ke báqí-mándon ko ikaṭṭhá kar ke

Ibtidáí Kalísiyá kí bunyád ḍálí

Dúsrá ghair qaumon ko naját kí da‘wat de de kar

Un men tablíg̣h kartá aur ta‘lím detá rahá

Is tarah donon ne mil kar mukhtalif taríqon se Masíh kí ek hí Kalísiyá ta‘mír kí

Donon barábar is láiq hain ki ham in kí ‘izzat karen

Donon shahíd ho kar jalál ke ek jaise sehre ke haqqdár ṭhaihre

Is liye ham farishton aur tamám muqaddason ke sáth

Lagátár yih kahte húe terí ta‘ríf karte hain

Quddús, Quddús, Quddús, 

Khudáwand, lashkaron ká Khudá;

Ásmán aur zamín tere jalál se ma‘múr hain.

‘Álam i bálá par Hosha‘ná.

Mubárak hai wuh jo Khudáwand ke Nám se átá hai :

‘Álam i bálá par Hosha‘ná.

Pák Sharákat kí áyat (Communion Antiphon): (Matí) Cf. Mt 16: 16, 18

Patras ne Yisú‘ se kahá; Tú Masíh zinda Khudá ká Beṭá hai.

Yisú‘ ne jawáb men kahá tú kefá hai

aur main is kefá par apní kalísiyá banáúngá

Pák Sharákat ke ba‘d kí Du‘á (Prayer after Communion)

Ai Khudáwand hamáre Khudá

Bakhsh de ki ham in Pák chízon se ásúda ho kar

Terí Kalísiyá men duniyá ke rúbarú aisí zindagí basar karen

 Ki roṭí toṛne kí rasm aur Rasúlon kí ta‘lím ke páband rahne se

Ek dil aur ek ján rahen níz terí mahabbat men har waqt qáim rahen

Masíh hamáre Khudáwand ke wasíle se. Ámín.

----

Resources:

Some great resources for Sunday Mass, Ordinary and Extraordinary Forms of the Rite at The Divine Lamp click here 

The Relationship Between Peter and Paul by Steve Ray, Catholic Answers Live Podcast click here

Was St. Peter first pope? Was he the rock? And what was his relationship with St. Paul? Answers to these questions and much more check out EWTN Audio Library Pope Fiction by Patrick Madrid here

For Prayer in honour of St. Paul in Roman Urdu Click here