Terá Kalám zamáne men ai Khudáwandá

"God gave me the gift of the Holy Spirit to listen to the whispering of His revelation about the WORD and guided me to put in the poetry & music form. God's revelation came in the month of December 1987, when I was staying in the Franciscan Friary and was in the final year in Christ the King Seminary in Karachi. The hymn, first time ever, was sung by the choir of Sada-e-Daur parish in Korangi, when the first Bible Sunday was celebrated in Pakistan. It was recorded in 1988". Fr. Francis Tanveer

Lyrics:

Terá Kalám zamáne men ai Khudáwandá

asar dikhá ke rahá jis bhí rúp men áyá

Tere Kalám ne ráton ko raushaní bakhshí

Tere Kalám ne tufán ká rukh badal d́álá

Terá Kalám hai shu‘la bhí aur shabnam bhí

Terá Kalám hai anmol ai Khudáwandá

Tere Kalám ne logon ko bakhshí ázádí

Tere Kalám se duniyá men inqiláb áyá

Na thá wajúd kisí shai ká jab zamáne men

Khudáyá tú thá tere sáth terá Kalma thá.

8 September 2013, 23rd Sunday in Ordinary Time C

Sál ke daurán teíswán Itwár (C)

Dákhilah (Entrance Antiphon):

(Zabúr) Psalm 118:137, 124

Ai Khudáwand tú ‘ádil hai aur terí qazá rást

Apne bande se apní nekí ke mutábiq sulúk kar

Jamá‘atí Du‘á (Collect):

Ai piyáre Báp Khudá

Tú hí hamárí naját ká bání hai

Tú hí hamen apná farzand baná letá hai

Mihrbání se apne piyáre bandon par tawajjuh kar

Táki ham Masíh par ímán lá kar sachchí ázádí aur dáimí mírás páen

Masíh hamáre Khudáwand ke wasíle se jo tere sáth

Rúhu’l Quds kí wahdáníyat men Khudá hai

Aur hamesha se hamesha tak zinda rahtá aur sultanat kartá hai. Ámín

Readings

Pahlí Tiláwat:

(Hikmat kí kitáb) Wisdom 9:13-18

Khudáwand kí marzí ko kaun samajh saktá hai?

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Zabúr: Psalm 89:3-6, 12-14, 17 Jamá‘ati jawáb áyát: 1

Jamá‘ati jawáb:

Ai Khudáwand tú hí pusht dar pusht

Hamárí panáhgáh rahá hai

Dusrí Tiláwat:

(Muqaddas Paulus Rasúl Ká Khatt Filemon ke nám) Philemon 9-10.12-17

Use phir qubúl kar, g̣hulám kí tarah nahín balki bháí kí tarah.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Gospel Acclamation

Hallelujah (Yúhanná) John 15:15

Hallelujah Hallelujah 

Khudáwand farmátá hai main tumhen dost kahtá hún

kyúnki jo báten main ne apne Báp se suní hain

wuh sab tumhen batá dí hain

Hallelujah 

Yá

Hallelujah (Zabúr) Psalm 118:135

Hallelujah Hallelujah 

Apná chihra apne bande par jalwagar farmá

Aur apne qawanín kí mujhe ta‘lím de

Hallelujah 

Injíl I Muqaddas:

(Muqaddas Lúqá ke mutábiq) Luke 14:25-33

Ek din ek baṛá hujúm us ke hamráh já rahá thá, to us ne phir kar un se kahá, ki agar koí mere pás áe, aur apne báp, aur mán, aur bíwí, aur bachchon, aur bháiyon, aur bhainon se balki apní ján se bhí kína na rakhe, to wuh merá shágird nahín ho saktá. Aur jo apní salíb na uṭháe, aur mere píchhe na áe wuh merá shágird nahín ho saktá.

Kyúnki tum men se aisá kaun hai, ki jab wuh burj banáná cháhai to pahle baiṭh kar tassurf ká hisáb na kar le, ki áyá mere pás us kí takmíl karne ká sámán hai, yá nahín. Aisá na ho, ki jab neo rakkhe aur taiyár na kar sake, to jo log dekhen wuh sab us par hansne lagen. Aur kahen ki is shakhs ne ta‘mír shurú‘ to kí magar takmíl na kar saká.

Yá kaun aisá bádsháh hai, jo dúsre bádsháh se jang karne jáne ko ho, to pahle baiṭh kar mashwara na kar le, ki áyá main das hazár ke sáth us ká sámná kar saktá hún yá nahín. Jo bís hazár le kar mujh par chaṛhá átá hai? Nahín to jab wuh hanoz dúr hí hai, qásid bhej kar sharáit-i sulh kí darkhwást karegá. Pas isí tarah jo koí tum men se apná sab kuchh tark na kare, merá shágird nahín ho saktá.

Injíl I Muqaddas ke wasíle se hamárí khatáen mu‘áf kí jáen.

Jamá‘at: Ai Masíh, terí sitáish ho.

Nazránon par Du‘á (Prayer over the Offerings)

Ai niháyat rahím Khudá

Haqíqí ‘aqídat aur dilí itmínán tujh hí se átá hai

Bakhsh de ki ham yih hadya lá kar

Munásib taur par terí ‘azmat kí ‘izzat karen

Aur pák ‘ibádat men sharík ho kar

Tere sáth aur ápas men

Ek hone ke ehsás kí taufíq páen

Masíh hamáre Khudáwand ke wasíle se. Ámín.

Pák Sharákat kí áyat (Communion Antiphon):

Cf. (Zabúr) Psalm 41:2-3

Jis tarah harní pání kí nadíon kí joyá hotí hai

Waise hí, ai Khudáwand merí ján terí mushtáq hai

Merí rúh Khudá kí zinda Khudá kí piyásí hai

OR

(Yúhanná) John 8:12

Khudáwand farmátá hai, dunyá ká núr main hún,

jo merí pairawí karegá, wuh tárikí men nahín chalegá

balki zindagí ká núr páegá.

Pák Sharákat ke ba‘d kí Du‘á (Prayer after Communion)

Ai Khudáwand hamáre Khudá

Tú apne Pák Kalám aur aur ásmání Sákráminṭ donon se

Apne ímán lánewálon kí parwarish kartá aur inhen zindagí bakhshtá hai

Hamen yih ‘ináyat kar ki

Tere piyáre Beṭe kí itní baṛí ni‘maton se fáida uṭháen

Aur hamesha har bát men

Us kí zindagí men sharík hone páen

Masíh hamáre Khudáwand ke wasíle se. Ámín.

...

Podcasts:

For Sermon by Fr. Robert Barron click here

For reflection by Dr. Scott Hahn click here

For commentary by Dr. John Bergsma on Sunday readings check out the Sacred Page click here

Some great resources for Sunday Mass, Ordinary and Extraordinary Forms of the Rite at The Divine Lamp click here

1 September 2013, 22nd Sunday in Ordinary Time C

Sál ke daurán báíswán Itwár (C)

Dákhilah (Entrance Antiphon):

(Zabúr) Cf. Psalm 85:3, 5

Ai Khudáwand mujh par rahm kar kyúnki main din bhar tere áge nálá kartá rahá hún.

Is liye ki tú Khudáwand nek aur g̣hafúr hai

aur apne iltijá karnewálon par niháyat rahím hai.

Jamá‘atí Du‘á (Collect):

Ai Lashkaron ke Khudá

Har afzal chíz terí milkiyat hai

Apne nám kí muhabbat ham men dil-nashín kar de

Aur hamen dín-dárí kí taraqqí ‘atá kar

Táki ham men nekíon aur khúbíon kí parwarish ho

Aur wuh terí khabargírí ke sáth

Parwarish pá kar mahfúz bhí rahen

Masíh hamáre Khudáwand ke wasíle se jo tere sáth

Rúhu’l Quds kí wahdáníyat men Khudá hai

Aur hamesha se hamesha tak zinda rahtá aur sultanat kartá hai. Ámín

Readings

Pahlí Tiláwat:

(Yisú‘ bin Sirákh) Ecclesiasticus 3:19-21, 30-31

Halímí ikhtiyár kar to, tú Khudáwand ká maqbúl hogá

Mere beṭe! Apne kám halímí se kar, to maqbúl sakhs ká piyárá hogá. Jitná tú ‘azmat men baṛhe, utná hí apne áp ko farotan kar, to Khudáwand kí khushnúdí tujhe hásil hogí. Kyúnki Khudáwand kí qudrat ‘azím hai, aur farotanon se us kí tamjíd hotí hai.

Mag̣hrúron kí jamá‘at ke liye ‘iláj nahín, kyúnki badí ká paudá un men jaṛ pakaṛegá, aur us ká patta bhí na lagegá. ‘Aqlmand ádmí ká dil tamsíl par g̣haur kartá hai, aur dánishmand kí khwáhish hotí hai, ki dhiyán se sune.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Responsorial Psalm:

Zabúr: 67:4-7, 10-11 Jamá‘ati jawáb áyát: Cf. 11

Jamá‘ati jawáb: Ai Khudá tú ne apní shafqat se,

        Muhtáj ke liye ghar taiyár kiyá.

Rástbáz khushí manáte

aur Khudá ke huzúr shádmání karte hain

Aur wuh farhat se masrúr hote hain

Khudá ke liye gáo, us ke nám kí hamd saráí karo

Khudáwand men shádmán ho, aur us ke huzúr shádmání karo

Ai Khudá tú ne apní shafqat se,

Muhtáj ke liye ghar taiyár kiyá.

Khudá apne muqaddas maskan men

Yatímon ká báp aur bewáon ká muháfiz hai

Khudá asíron ko ghar detá hai

Wuh qaidíon ko iqbál-mandí kí taraf nikál látá hai.

Ai Khudá tú ne apní shafqat se,

Muhtáj ke liye ghar taiyár kiyá.

Ai Khudá tú ne apní mírás men ba kasrat menh barsáyá,

Aur jab yih murjhá rahí thí to tú ne use tázagí bakhshí.

Terá gallah us men basne lagá

Ai Khudá, tú ne apní ‘ináyat se use muhtáj ke liye taiyár kiyá.

Ai Khudá tú ne apní shafqat se,

Muhtáj ke liye ghar taiyár kiyá.

Dusrí Tiláwat:

(‘Ibráníon ke nám Khatt) Hebrews 12:18-19.22-24

Tum Koh-i Saihún aur zinda Khudá ke shahr ke pás áe ho.

Ai bháiyo, tum us paháṛ tak nahín  áe jo chhúá já sake, na us kí jaltí ág, aur kálí ghaṭá, aur táríkí, aur túfán aur narsinge ke shor, aur kalám kí áwáz ke pás jise sunnewálon ne sun kar darkhwást kí, ki yih kalám phir ham se na kiyá jáe. Lekin tumhen Koh-i Saihún par, aur zinda Khudá ke shahr ya‘ní ásmání Yarúshalem, aur lákhon firishton kí mahfil, aur pahlauṭhon kí jamá‘at men jin ke nám ásmán par likhe húe hain, aur us Khudá ke pás jo sab ká munsif hai, aur kámil kiye húe rástbázon kí rúhon ke pás, aur ‘ahd-i-Jadíd ke darmiyání Yisú‘, ke pás áe ho.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Gospel Acclamation

Hallelujah: (Yúhanná) John 14:23

Hallelujah Hallelujah 

Agar koí mujhe piyár kartá hai to wuh mere kalám par ‘amal karegá

aur merá Báp bhí use piyár karegá

aur ham us ke pás áenge.

Hallelujah 

Yá

Hallelujah: (Matí) Matthew 11:29

Hallelujah, Hallelujah

Merá júá uṭhá lo, aur mujh se síkho,

Kyúnki main halím, aur dil ká farotan hún

Hallelujah

Injíl I Muqaddas:

(Muqaddas Lúqá ke mutábiq) Luke 14:1.7-14

Jo koí apne áp ko baṛá banáegá, wuh chhoṭá kiyá jáegá, aur jo koí apne áp ko chhoṭá banáegá, wuh baṛá kiyá jáegá.

Ek Sabt ke din aisá húá ki Yisú‘ Farísíon ke sardáron men se kisí ke ghar roṭí kháne gayá, aur wuh us kí ghát men rahe. Jab us ne dekhá, ki mihmán kyún kar sadr jagah pasand karte hain, to us ne un ke liye ek tamsíl pesh kí, aur un se kahá, jab tú shádí men buláyá jáe to sadr jagah par na baiṭh, sháyad ki tujh se bhí koí ziyáda ‘izzatdár buláyá gayá ho, aur jis ne tujhe aur use donon ko buláyá hai á kar tujh se kahe ki yih jagah us ko de, aur tujh ko sharminda ho kar sab se níche baiṭhná paṛe. Balki jab tú buláyá jáe, to sab se níchí jagah baiṭh, táki jab wuh jis ne tujhe buláyá hai áe, to tujh se kahe,  ki Ai dost, áge baṛh kar já baiṭh, tab sab mihmánon ke sámne terí ‘izzat hogí, kyúnki jo koí apne áp ko baṛá banáegá, wuh chhoṭá kiyá jáegá, aur jo koí apne áp ko chhoṭá banáegá, wuh baṛá kiyá jáegá.

Phir us ne us se bhí jis ne us kí da‘wat kí thí kahá ki jab tú chásht yá ‘isháiyyah kí taiyárí kare to apne doston yá bháiyon yá rishtadáron yá daulatmand paṛausiyon ko na bulá, aisá na ho ki wuh bhí tujhe buláen, aur terá badla ho jáe. Balki jab tú ziyáfat kare to g̣haríbon, lunjon, langṛon, aur andhon ko bulá, aur tú mubárak hogá, kyúnki un ke pás kuchh nahín, ki tujhe badla den, magar tujhe rástbázon kí qiyámat men badla diyá jáegá.

Injíl I Muqaddas ke wasíle se hamárí khatáen mu‘áf kí jáen.

Jamá‘at: Ai Masíh, terí sitáish ho.

Nazránon par Du‘á (Prayer over the Offerings)

Ai Khudáwand hamáre Khudá

‘atá kar ki yih pák nazrána

Hamen lagátár terí fazl bakhsh barkat diláe

Aur jo kuchh nishán ke taur par is se hotá hai

Wuh terí muassir qudrat se kámilíyat páe

Masíh hamáre Khudáwand ke wasíle se. Ámín.

Pák Sharákat kí áyat (Communion Antiphon):

(Zabúr) Psalm 30:20

Ai Khudáwand, Terí wuh mihrbání kitní ‘azím hai

jo túne apne ḍarnewalon ke liye rakh chhoṛí hai.

OR

(Matí) Matthew 5:9-10

Mubárak hain wuh jo sulh karáte hain,

wuh Khudá ke farzand kahláenge.

Mubárak hain wuh jo rástí ke sabab satáe gaye hain,

ásmán kí bádsháhat unhín kí hai.

Pák Sharákat ke ba‘d kí Du‘á (Prayer after Communion)

Ai Khudá

Ham tujh se iltijá karte hain

‘ináyat kar ki ham ásmání ziyáfat kí roṭí khá kar

Muhabbat kí is g̣hizá ke asar se

Dil is qadr mazbút ho jáen

Ki apne bháiyon men terí khidmat karne ke liye taiyár hún

Masíh hamáre Khudáwand ke wasíle se. Ámín.

...

Podcasts:

For Sermon by Fr. Robert Barron click here

For reflection by Dr. Scott Hahn click here

For commentary by Dr. John Bergsma on Sunday readings check out the Sacred Page click here

Some great resources for Sunday Mass, Ordinary and Extraordinary Forms of the Rite at The Divine Lamp click here

Muqaddasa Moníká (Saint Monica)

Muqaddasa Moníká, hamáre wáste du‘á kar

Du‘á:

Ai Qádir i Mutlaq Khudá

Khándání zindagí terí taraf se hotí hai

Magar ba‘z daf ‘ah kuchh gharon men

Insání kamzorí kí waja se ikhtiláfát páe játe hain

Jis se khándán mustássir hote hain

‘atá kar ki Muqaddasa Moníká kí du‘áon kí badaulat

Hamáre khándánon men am’n o ittihád qáim rahe

aur máon kí du‘áon se bachche Khudáwand se mile rahen. Ámín.

To learn more about Saint Monica click here