July 20th, 2013 | Saturday Women's Session
Thursday, 22 August 2013
Wednesday, 21 August 2013
Friday, 16 August 2013
18 August 2013, 20th Sunday in Ordinary Time C
Sál ke daurán Bíswán Itwár (C)
Dákhilah (Entrance
Antiphon):
(Zabúr) Ps
83: 10-11
Ai hamáre muháfiz Khudá
Tawajjuh kar aur apne mamsúh ke chihre par nigáh farmá
Kyúnki terí bárgáhon men ek din
kisí aur jagah ke hazar dinon se bihtar hai.
Jamá‘atí Du‘á (Collect):
Ai niháyat mihrbán Khudá
Tú ne apne piyár karne wálon ke liye
An-dekhí achchhí chízen taiyár kar rakhí hain
Hamáre dilon ko apní mahabbat se ma‘múr kar
Táki ham har bát men
Sab chízon se baṛh kar tujh hí se mahabbat rakhen
Aur tere us wa‘da ká púrá honá dekhne páen
Jo hamárí har khwáhish se kahín ziyáda ‘azím
hai
Masíh hamáre Khudáwand ke wasíle se jo tere sáth
Rúhu’l Quds kí wahdáníyat men Khudá hai
Aur hamesha se hamesha tak zinda rahtá aur sultanat kartá hai. Ámín
Readings
Pahlí Tiláwat:
(Irmiyá nabí ká sahífa) Jeremiah 38:4-6.8-10
Tú tamám logon kí badí ká khwáhán hai
Pák
kalám ke paṛhe aur sune jáne par Khudá kí barkat ho.
Jamá‘at:
Khudá ká shukr ho.
Responsorial Psalm
Zabúr: Psalm 39:2-4, 18 Jamá‘ati jawáb áyát: 14
Jamá‘ati jawáb: Ai Khuáwand merí madad ke liye á
Dusrí Tiláwat:
(Muqaddas Paulus Rasúl Ká Khatt ‘Ibráníon ke nám) Hebrews 12:1-4
Ham sabr se is dauṛ men dauṛen, jo hamáre sámne
hai
Pák
kalám ke paṛhe aur sune jáne par Khudá kí barkat ho.
Jamá‘at:
Khudá ká shukr ho.
Gospel Acclamation
Hallelujah: Cf. (A‘mál) Acts 16:14
Hallelujah Hallelujah
Ai Khudáwand hamáre dil khol
ki tere Beṭe kí báton ko qabúl karen.
Hallelujah
Yá
Hallelujah: (Yúhanná) John 10:27
Hallelujah Hallelujah
Khudá farmátá hai, merí bheṛen merí áwáz suntí hain,
Main unhen jántá hún
Aur wuh mere píchhe píchhe átí hain
Hallelujah
Injíl I Muqaddas:
(Muqaddas Lúqá ke mutábiq) Luke
12:49-53
Main zamín par sulh karáne nahín, balki judáí karáne
áyá hún.
Ek din Yisú‘ ne apne shágirdon
se kahá: Main zamín par ág bhaṛkáne áyá hún, to main
aur kyá cháhtá hún magar yih, ki wuh jal paṛe? Aur mujhe ek istibág̣h lena
hai, to main kaisá be-chain hún, jab tak wuh ho na le.
Kyá tum gumán karte ho, ki main
zamín par sulh karáne áyá hún? Main tum se kahtá hún,
ki nahin, balki judáí karáne. Kyúnki ab se ek ghar ke pánch
ápas men mukhálafat rakkhenge, tín se do, aur do se tín mukhálafat
rakkhenge, báp beṭe se, aur beṭá báp se, mán beṭí se, aur
beṭí mán se, sás bahú se, aur bahú sás se.
Injíl I Muqaddas ke wasíle se hamárí khatáen mu‘áf
kí jáen.
Jamá‘at: Ai Masíh, terí sitáish ho.
Nazránon par Du‘á (Prayer over the Offerings)
Ai Khudáwand hamáre Khudá
Hamáre nazráne qabúl farmá
Jin se hamárí naját ká shándár kám injám pátá hai
‘ináyat kar ki ham tujh se yih chízen pá kar aur inhen
terí nazr kar ke
Tujh hí ko páne ke qábal hon
Masíh hamáre Khudáwand ke wasíle se. Ámín.
Pák Sharákat kí
áyat (Communion Antiphon):
(Zabúr) Ps 129:
7
Khudáwand ke
pás shafqat hai
aur us ke pás kasrat se fidya hai
Or
(Yúhanná) Jn 6: 51-52
Khudáwand farmátá hai ki Main wuh
zinda roṭí hún jo ásmán se utarí hai
Agar koí is roṭí men se kháe to hamesha
tak zinda rahegá
Pák Sharákat ke ba‘d kí Du‘á (Prayer after Communion)
Ai mihrbán Khudáwand Khudá
Ham is pák ‘ibádat ke zarí‘a Masíh hí men sharík húe hain
Ham tujh se ‘ájizí ke sáth iltijá karte hain
‘ináyat kar ki ham is jahán men us ke ham-shakl ban kar
Ásmán men us ke ham-nashín banne ke qábal hon
Jo tere sáth hamesha se hamesha tak
Zinda rahtá aur sultanat kartá hai. Ámín
...
Podcasts:
For
Sermon by Fr. Robert Barron click here
For
reflection by Dr. Scott Hahn click here
For
commentary by Dr. John Bergsma on Sunday readings check out the Sacred Page
click here
Some
great resources for Sunday Mass, Ordinary and Extraordinary Forms of the Rite
at The Divine Lamp click here
Wednesday, 14 August 2013
Thursday 15 August 2013, The Assumption of the Blessed Virgin Mary
Muqaddasa Kunwárí Mariyam ká ásmán par uṭháyá jáná
Dákhilah (Entrance
Antiphon): (Mukáshafa) Rev
12:1
Ek baṛá
nishán ásmán par nazar áyá ya‘ní ek khátún jo súraj ko oṛhe húe, pánwon tale
chánd rakkhe aur bárah sitáron ká táj pahinne húe thí
Jamá‘atí Du‘á (Collect):
Ai Qádir i Mutlaq aur azlí Khudá
Tú ne apne Beṭe kí mán be-dág̣h Kunwárí Mariyam ko
Jism aur Rúh ke sáth ásmání jalál men dákhil kiyá
‘ináyat farmá ki ham har waqt ásmán kí chízon kí fikr men
rahte húe
Usí ke jalál men sharík hone ke láiq banen
Masíh hamáre Khudáwand ke wasíle se jo tere sáth
Rúhu’l Quds kí wahdáníyat men Khudá hai
Aur hamesha se hamesha tak zinda rahtá aur sultanat kartá hai. Ámín
Readings
Pahlí
Tiláwat:
(Mukáshafa
kí kitáb) Apocalypse 11:19, 12:1-6, 10
Ek ‘aurat
súraj ko oṛhe húe chand par khaṛí thí
Us
waqt Khudá kí haikal ásmán men khul gayí aur us kí haikal
men us ke ‘ahd ká sandúq nazar áyá, aur bijliyán, aur
áwázen, aur garajen paidá húín, aur zalzalah áyá,
aur baṛe baṛe ole paṛe.
Phir ek baṛá nishán ásmán nazar áyá,
ya‘ní ek khátún jo súraj ko oṛhe húe thí, aur jis ke pánwon
ke níche chánd, aur sir par bárah sitáron ká táj thá.Wuh hámila
thí, aur taklíf men ho kar dard i zih ke sabab se chillátí thí.
Tab ek aur nishán ásmán par dikháí diyá; aur
dekh, surkh rang ká ek baṛá azhdahá jis ke sát sir, aur das síng
the, aur sát táj us ke siron par the, aur us kí dum ne ásmán ke tiháí
sitaron ko khench kar zamín par girá diyá: phir azhdahá us khatún
ke áge jis ká bachcha paidá hone ko thá, já khaṛá húá, táki jab bachcha
paidá ho, to use nigal jáe. Aur us ke hán narínah farzand húá, jo
lohe ke ‘asá se sab qaumon par hukúmat karegá, aur us ká farzand Khudá
aur us ke takht ke pás tak uṭhá liyá gayá.
Aur
wuh khátún biyábán men bhág gayí, jahán Khudá ne
us ke liye jagah taiyár kí hai, táki wahán ek hazár do sau sáṭh din
tak us kí parwarish kí jáe. Tab main ne ek baṛí áwáz ásmán men
yih kahte suní, ki
Ab naját, aur qudrat, aur hamáre Khudá
kí bádsháhí aur us ke Masíhí ká ikhiyár záhir húa.
Pák kalám
ke paṛhe aur sune jáne par Khudá kí barkat ho.
Jamá‘at: Khudá ká shukr ho.
Responsorial Pslam
Malika
tere dahine háth
Ofír ke
sone se muzayyan khaṛí hai.
Sháhon
kí betiyán terá istiqbál kartí hain
Malika
tere dahine háth Ofír ke sone se muzayyan khaṛí hai
Ai
beṭí sun, g̣haur kar ke kán lagá,
Apní
qaum aur apne báp ká ghar bhúl já
Malika tere
dahine háth
Ofír ke
sone se muzayyan khaṛí hai.
Bádsháh
tere husn ká mushtáq hogá:
Wuhí
terá Khudáwand hai, to us kí mutí‘ ho
Wuh
khushí aur shádmání se pahuncháí játí hain
Wuh
sháhí mahall men dákhil hotí hai
Malika
tere dahine háth
Ofír ke
sone se muzayyan khaṛí hai.
Dusrí
Tiláwat:
(Muqaddas
Paulus Rasúl Ká
Pahlá Khatt Qurintíon Ke Nám) 1 Corinthians 15:20-26
Pahlá
phal Masíh aur phir wuh jo us ke hain.
Ai bháiyo, Masíh fíl-haqíqat un men se jo so gaye hain,
pahlá phal ho kar murdon men se jí uthá hai. Kyúnki jab
insán ke sabab se maut áí, to insán hí ke sabab se murdon kí qiyámat
bhí áí. Aur jaisá Ádam men sab marte hain, waisá hí Masíh men
sab zinda kiye jáenge. Lekin har ek apní apní bárí men: pahlá
phal Masíh, wuh jo Masíh kí ámad par us ke hain. Aur us ke ba‘d khátma
hogá, jab wuh sárí hukúmat aur sárá ikhtiyár aur qudrat nest kar
ke saltanat Khudá ya‘ní Báp ke hawále kar degá. Kyúnki jab tak
wuh sab dushmanon ko apne pánwon tale na láe, zarúr hai ki
saltanat kare. Sab se pichhlá dushman jo nest kiyá jáegá wuh maut hai.
Pák kalám
ke paṛhe aur sune jáne par Khudá kí barkat ho.
Jamá‘at: Khudá ká shukr ho.
Hallelujah:
Hallelujah Hallelujah
Mariyam ásmán par uṭhá lí gayí hai
Firishton kí tamám Jamá‘aten khushí
manáti hain
Hallelujah
Injíl I
Muqaddas:
(Muqaddas
Lúqá ke mutábiq) Luke
1:39-56
Al Qádir
ne mere liye baṛe baṛe kám kiye hain, us ne past hál ko buland kiyá hai.
Un
dinon men Mariyam uṭh kar jaldí se kohistán men
Yahúdáh ke ek shahr ko gayí. Aur Zakaryáh ke ghar men dakhil
hokar Ilísábát ko salám kiyá. Aur jonhín Ilísábát ne
Mariyam ká salám suná to bachcha us ke batn men uchhal paṛá aur Ilísábát
Rúh-u’l Quds se bhar gayí. Aur buland áwáz se pukár kar kahne lagí. Ki
tú ‘auraton men mubárak hai aur tere batn ká phal mubárak
hai. Aur mere liye yih bát kaise húí ki mere Khudáwand kí mán
mere pás áí? kyúnki dekh jonhí tere salám kí áwáz mere
kán men pahunchí, to bachcha mere batn men khushí se uchhal paṛá. Aur mubárak hai wuh jo
ímán láí, kyúnki jo baten Khudáwand kí taraf se
kahí gaí thín wuh púrí hongí.
Aur
Mariyam ne kahá:
Merí
ján Khudáwand kí baṛáí kartí hai,
aur
merí rúh mere naját denewále Khudá se khush húí;
Kyúnki us ne apní bandí kí pasthálí par nazar kí:
Is liye dekh ab se lekar har zamáne ke log mujhe mubárak
kahenge.
Kyúnki Al-Qádir ne mere liye baṛe baṛe kám
kiye hain,
Aur us ká nám Quddús hai.
Aur us kí rahmat un par jo us se darte hain
Pusht dar pusht rahtí hai.
Us ne apne bázú se zor dikháyá;
Aur unhen jo dil ke qiyás se maghrúr hain paráganda
kar diyá
Us
ne qudrat wálon ko takht se girá diyá,
Aur
pasthálon ko buland kiyá.
Us
ne bhúkon ko achchhí chízon se ser kar diyá,
Aur
daulatmandon ko khálí háth lauṭá diyá.
Us
ne apne bande Isráíl kí dastgíri kí,
Táki
apní us rahmat ko yád farmáe,
Jo
Ibráhím aur us kí nasl par abad tak rahegí
Jaisá
us ne hamáre bápdádá se kah diyá thá
Aur
Mariyam tín mahíne ke qaríb us ke sáth rahí, aur apne ghar ko lauṭ gayí.
Injíl I
Muqaddas ke wasíle se hamárí khatáen mu‘áf kí jáen.
Jamá‘at: Ai Masíh, terí sitáish ho.
Nazránon par Du‘á (Prayer over the Offerings)
Ai Khudáwand hamáre Khudá
Kásh hamárá ‘aqídat-mandí ká nazrána tere maqbul i nazar ho
Aur Muqaddasa Mariyam Kunwárí ásmán takht
nashín ho kar
Hamáre liye sifárísh kartí rahe
Nez hamáre dilon men wuh ág sulgáe
Jis se ham men har waqt yih fikr táza rahe
Ki ek din tere huzúr áne ke qábil hon
Masíh hamáre Khudáwand ke wasíle se. Ámín.
Pák
Sharákat kí áyat (Communion Antiphon):
(Lúqá) Luke
1:48-49
Har
zamáne ke log mujhe mubárak kahenge, kyúnki Al-Qádir ne mere
liye baṛe baṛe kám kiye hain.
Pák Sharákat
ke ba‘d kí Du‘á
Ai Khudáwand hamáre Khudá
Ham ne naját ká Sákaráminṭ liyá hai
Bakhsh de ki Muqaddasa Mariyam Kunwáríapne ásmán takht par se
Hamáre liye sifárishen kar ke jí uṭhne ká jalál hamen
diláe
Masíh hamáre Khudáwand ke wasíle se. Ámín.
---
Tracts on Catholic Answers:
Catholic Encyclopedia
Church Documents:
Church Fathers on The Assumption click here
Dogma of the
Assumption of Mary --Pope Pius XII
Books:
Books by Mark Shea
CD Sets by Tim Staples
CD Set - New
Eve, Mediatrix And Mother
Video:
Scott Hahn on the Assumption of the Blessed Virgin Mary
Video:
Scott Hahn on the Assumption of the Blessed Virgin Mary
Subscribe to:
Posts (Atom)