25 August 2013, 21st Sunday in Ordinary Time C

Sál ke daurán Ikkíswán Itwár (C)

Dákhilah (Entrance Antiphon):

 (Zabúr) cf. Psalm 85: 1- 3

Ai Khudáwand apná kán jhuká aur merí sun.

Ai mere Khudá tere bande ká tawakkul tujh hí par hai. Use riháí bakhsh de.

Ai Khudáwand, mujh par rahm kar; kyúnki main din bhar tere pás chillátá rahá.

Jamá‘atí Du‘á (Collect):

Ai Wáhid Khudá

Tú ímándáron ko yak dil banátá

Aur un ko ittifáq aur ittihád kí taufíq ‘ata kartá hai

‘ináyat kar ki tere log

Tere hukmon ko ‘azíz jánen

Aur tere wa‘don ke púre hone kí tamanná karen

Táki wuh is badaltí húí duniyá kí badaltí hálaton men

Apne dilon ko badale bag̣hair

Haqíqí khushí kí taraf lagáe rakhen

Masíh hamáre Khudáwand ke wasíle se jo tere sáth

Rúhu’l Quds kí wahdáníyat men Khudá hai

Aur hamesha se hamesha tak zinda rahtá aur sultanat kartá hai. Ámín

Readings

Pahlí Tiláwat:

(Isha‘yá  nabí ká sahífa) Isaiah 66:18-21

Wuh tumháre sab bháiyon ko tamám aqwám ke darmiyán se láenge

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Responsorial Pslam

Zabúr: Psalm 116  Jamá‘ati jawáb áyát: (Marqus) Mark 16:15

Jamá‘ati jawáb: Tamám duniyá men já kar Injíl kí munádí karo

Ai sab qaumo Khudáwand kí hamd karo

Ai sab ummato us kí tausíf karo

          Tamám duniyá men já kar Injíl kí munádí karo

Kyúnki us kí rahmat ham par ustuwár hai

Aur Khudáwand kí wafá abad tak qáim hai

Tamám duniyá men já kar Injíl kí munádí karo

Dusrí Tiláwat:

(Muqaddas Paulus Rasúl Ká Khatt ‘Ibráníon ke nám) Hebrews 12:5-7.11-13

Khudáwand jis ko piyár kartá hai, us kí tádíb kartá hai.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Gospel Acclamation

Hallelujah: (Yúhanná) John 14:23

Hallelujah Hallelujah 

Agar koí mujhe piyár kartá hai to wuh mere kalám par ‘amal karegá

aur merá Báp bhí use piyár karegá

aur ham us ke pás áenge.

Hallelujah 

Yá

Hallelujah: (Yúhanná) John14:6

Hallelujah Hallelujah 

Khudáwand farmátá hai Ráh, aur Haqq, aur Zindagí main hún

Mere wasíle ke bag̣hair Báp ke pás koí nahín á saktá.

Hallelujah 

Injíl I Muqaddas:

(Muqaddas Lúqá ke mutábiq) Luke 13:22-30

Mashriq, aur mag̣hrib se log áenge aur Khudá kí bádsháhí kí ziyáfat men sharík honge.

Un dinon men Yisú‘  Yarúshalem játe húe shahr shahr aur gánw gánw phir kar ta‘lím detá thá. Aur kisí ne us se kahá, ai Khudáwand, kyá naját pánewale thoṛe hain? Us ne un se kahá, jánfishání karo, ki tum tang darwáze se dákhil ho, kyúnki men tum se kahtá hún, ki bahutere koshish karenge ki dákhil hon magar ho na sakenge.

Jab ghar ká málik uṭh kar darwáza band kar chuká ho, to tum báhar khaṛe ho kar yún kahte húe darwáze khaṭkhaṭáná shurú karoge, ki ai Khudáwand hamáre liye khol de, aur wuh jawáb de kar tum se kahegá, ki main tumhen nahín pahchántá, tum kahán ke ho? Tab tum kahne lagoge, ki ham ne tere huzúr men kháyá piyá, aur tú ne hamáre bázáron men ta‘lím dí. Lekin wuh tum se kahegá, main tumhen nahín pahchántá, tum kahán ke ho? “Ai sáre badkardáro, mere pás se dúr ho jáo”

Wahán roná aur dánton ká bajná hogá, jab Ibráhím, aur Isháq, aur Ya‘qúb, aur sab nabíon ko Khudá kí bádsháhí men shámil, aur apne áp ko báhar nikálá húá dekhoge. Aur mashriq, mag̣hrib, shimál, janúb se log á kar Khudá kí bádsháhí kí ziyáfat men sharík honge.

Aur dekho, ba‘z ákhir aise hain jo awwal honge, aur ba‘z awwal hain, jo ákhir honge.

Injíl I Muqaddas ke wasíle se hamárí khatáen mu‘áf kí jáen.

Jamá‘at: Ai Masíh, terí sitáish ho.

Nazránon par Du‘á (Prayer over the Offerings)

Ai Khudáwand hamáre Khudá

Tú ne ek hí zabíhah ke ek bár qurbán hone ke zarí‘a

Apne liye lepálak farzandon kí qaum kharídí hai

Apne rahm o karam se apne kalísiyá ko aman aur ittihád kí taufíq ‘ináyat farmá

Masíh hamáre Khudáwand ke wasíle se. Ámín.

Pák Sharákat kí áyat (Communion Antiphon):

 (Zabúr) Ps 103: 13-15

Ai Khudáwand terí san‘aton ke samar se zamín ásúda hogí

táki tú zamín se roṭí nikále

aur mai insán ke dil ko khush kare.

Or

(Yúhanná ) John 6:55

Khudáwand farmátá hai ki jo merá gosht khátá aur merá khún pítá hai

wuh hamesha kí zindagí rakhtá hai,

aur main use yaum-i akhar men phir zinda karúngá.

Pák Sharákat ke ba‘d kí Du‘á (Prayer after Communion)

Ai Khudáwand hamáre Khudá

Ham tujh se minnat karte hain

Ham men apne rahm ke mutábiq púre ‘iláj ká kám kar de

Mihrbán ho kar ham wuh rúh paidá kar

Ki jis se ham khud ba-khud sar-garmí ke sáth sab kuchh terí pasand ke muwáfiq karen

Masíh hamáre Khudáwand ke wasíle se. Ámín.

...

Podcasts:

For Sermon by Fr. Robert Barron click here

For reflection by Dr. Scott Hahn click here

For commentary by Dr. John Bergsma on Sunday readings check out the Sacred Page click here

Some great resources for Sunday Mass, Ordinary and Extraordinary Forms of the Rite at The Divine Lamp click here

4 August 2013, 18th Sunday in Ordinary Time C

Sál ke daurán aṭhárahwán Itwár (C)

Dákhilah (Entrance Antiphon):

 (Zabúr) Psalm 69: 2, 6

Ai Khudá, karm kar ke mujhe bachá le.

Ai Khudáwand jald merí madad kar,

tú hí merá parwardigár, aur merá bacháne wálá hai.

Ai Khudáwand der na kar.

Jamá‘atí Du‘á (Collect):

Ai Khudáwand hamáre Khudá

Tere bande sab se baṛh kar yih khwáhish rakhte hain

Ki tú hamen hamesha apná rahm dikhátá rahe

Hamáre liye fakhr ká sabab yih hai

Ki tú hí hamárá kháliq aur málik hai

Pas apne bandon kí taraf tawajja kar

Apní pahlí ni‘maten bahál kar

Aur bahál kar ke inhen qáim rakkh

Masíh hamáre Khudáwand ke wasíle se jo tere sáth

Rúhu’l Quds kí wahdáníyat men Khudá hai

Aur hamesha se hamesha tak zinda rahtá aur sultanat kartá hai. Ámín

Readings

Pahlí Tiláwat:

(Jámi‘ kí kitáb) Ecclesiastes 1:2; 2:21-23

Insán ko us kí sárí mushaqqat se kyá faida

Bátil hí bátil, yih hai Jámi‘ ká kahná.

Bátil hí bátil sab kuchh bátil hai

Kyúnki ek insán aisá hai, jis kí mihnat, hikmat, ‘ilm, aur hunar-mandí se hai. Par wuh use dúsre aise ádamí ke hisse ke liye chhoṛ jáegá, jis ne mihnat nahín kí yih bhí bátil aur baṛí qabáhat hai. To insán ko apni, tamám mihnat aur apne dil kí us bezárí se kyá fáida hai jo us ne súraj ke níche uṭháí. kyúnki us ke tamám ayyám andoh aur us ká shug̣hl musíbat hai, yahán tak ki rát ko bhí us ká dil árám nahín pátá, yih bhí bátil hai.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Zabúr: Psalm 94:1-2, 6-9 Jamá‘ati jawáb áyát: 8-7

Jamá‘ati jawáb:

Kásh ki áj tum us kí áwáz suno!

Tum apne dil ko sakht na karo

Áo, ham Khudáwand ke liye nag̣hma pardází karen

apní naját kí chatán ke liye khushí se lalkáren.

Us ke huzúr shukrguzárí karte húe áen

aur gít gáte húe us ke áge khushi ke na‘re máren.

 Kásh ki áj tum us kí áwáz suno!

  Tum apne dil ko sakht na karo

Áo, ham jhuken, aur sijda karen

Aur apne kháliq Khudáwand ke áge dozánú ho jáen

Kyunki wuhí hamárá Khudá hai  

Aur ham us kí pásbání kí ummat

Balki us kí hidáyat ká gallah hain

 

  Kásh ki áj tum us kí áwáz suno!

  Tum apne dil ko sakht na karo

Kásh ki áj tum us kí áwáz suno 

Tum apne dil ko sakht na karo, jaisá Maríbah men

Ya jaisá Massah ke din, biyábán men kiyá thá

Jahán tumháre ajdád ne merá imtihán kiyá,

aur mere kámon ko dekh kar bhí mujhe ázmáyá

 

Kásh ki áj tum us kí áwáz suno!

  Tum apne dil ko sakht na karo

Dusrí Tiláwat:

(Muqaddas Paulus Rasúl Ká Khatt Kulussíon ke nám) Colossians 3:1-5.9-11

Ai bháiyo! Agar tum Masíh ke sáth jí uṭhe ho to ‘álam i bálá kí chízon kí talásh men raho, jahán Masíh Khudá kí dahiní taraf baiṭhá húá hai. ‘álam i bálá kí chízon ke khayál men raho, na ki un ke jo zamín par hain. Kyúnki tum mar chuke ho, aur tumharí zindagí Masíh ke sáth Khudá men chhupí húí hai. Jab Masíh jo hamárí zindagí hai záhir hogá, to tum bhí us ke sáth jalál men záhir ho jáoge. 

Pas tum apne zamíní a‘zá ko murda rakkho, ya‘ní harámkárí nápákí, shahwat, burí khwáhish aur lálach ko jo but parastí ke barábar hai. Ek dúsre se jhúth na bolo, tum ne to purání insáníyat ko us ke kámon samet utár diyá hai. Aur us nayí ko pahin liyá hai, jo ma‘rifat hásil karne ke liye apne kháliq kí súrat par nayí bantí játí hai. Jahán na koí Yúnání hai, na Yahúdí, na makhtún, na g̣hair makhtún, na barbarí, na Askútí, na g̣hulám, aur na ázád, magar Masíh hí sab kuchh hai, aur sab men hai.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Gospel Acclamation

Hallelujah: (Yúhanná) John 17:17

Hallelujah, Hallelujah

Ai Khudáwand terá Kalám sachcháí hai,

Sachcháí ke wasíle se hamen muqaddas kar

Hallelujah

Yá

Hallelujah: (Matí) Matthew 5:3

Hallelujah, Hallelujah

Mubárak hain wuh jo rúh ke g̣haríb hain.

Kyúnki ásmán kí bádsháhí unhí kí hai

Hallelujah

Injíl I Muqaddas:

(Muqaddas Lúqá ke mutábiq) Luke 12:13-21

Jo tú ne jama‘ kiyá hai, wuh kis ká hogá?

Ek din hujuḿ men se kisí ne us se kahá, ki ai Ustád mere bháí se kah, ki mírás ká merá hissa mujhe de. Magar us ne us se kahá, ki miyán! Kis ne mujhe tum par qází yá muqassim muqarrar kiya? Aur us ne un se kahá, ki khabardár raho, aur sáre lálach se kinára karo; kyúnki kisí kí zindagí us ke mál kí firáwání par munhasir nahín.

Aur us ne un se ek tamsíl kahí, ki kisí daulatmand kí zamín men bahut fasl húí, Aur wuh apne dil men soch kar kahne lagá, ki Main kyá karún, kyúnki mere hán jagah nahín, jahán apní paidáwár jama‘ karún. Aur us ne kahá, Main yih karúngá : ki apní koṭhiyán ḍháúngá, aur baṛí banáúngá; aur wahán apná tamám anáj aur mál jama‘ karúngá. Aur apní ján se kahúngá, ki Ai ján tere pás bahut sá mál bahut barason ke liye jama‘ hai; chain kar, khá, pí, ‘aish kar. Magar Khudá ne use kahá, Ai nádán, isí rát terí ján tujh se talab kar lí jáegí: pas jo tú ne taiyár kiyá hai, wuh kis ká hogá? Aisá hí wuh hai, jo apne liye khazána jama‘ kartá hai, aur Khudá ke nazdík daulatmand nahín.

Injíl I Muqaddas ke wasíle se hamárí khatáen mu‘áf kí jáen.

Jamá‘at: Ai Masíh, terí sitáish ho.

Nazránon par Du‘á (Prayer over the Offerings)

Ai Khudáwand hamáre Khudá

Ham tujh se minnat karte hain

Apne rahm o karam se in hadyon ko pák kar

Yih us rúhání qurbání kí nazr ṭhahrenge

Jis ke zarí‘e tú hamen bhí ek kámil nazrána banáegá

Hamen yih taufíq ‘atá kar

Masíh hamáre Khudáwand ke wasíle se. Ámín.

Pák Sharákat kí áyat (Communion Antiphon):

(Hikmat) Wisdom 16:20

Ai Khudáwand tú ne hamen ásmán se taiyár kardah aisí roṭí bakhshí jis men har tarah kí lazzat aur har záiqa kí shiríni hai.

Or

(Yúhanná ) John 6:35

Khudáwand farmátá hai ki main zindagí kí roṭí hún, jo mere pás áe wuh hargiz bhúká na hogá, aur jo mujh par ímán láe wuh kabhí piyásá na hogá.

Pák Sharákat ke ba‘d kí Du‘á (Prayer after Communion)

Ai Khudáwand hamáre Khudá

Tú ne ásmání ni‘mat ke zarí‘e hamen tázagí bakhshí hai

Hamesha hamárá sáth de

Har waqt ham par apná rahm o karam názil farmá

Aur hamen is qábal ṭhahrá

Ki abdí naját páen

Masíh hamáre Khudáwand ke wasíle se. Ámín.

…

Podcast:

For Sermon by Fr. Robert Barron click here

For reflection by Dr. Scott Hahn click here

For commentary by Dr. John Bergsma on Sunday readings check out the Sacred Page click here

Some great resources for Sunday Mass, Ordinary and Extraordinary Forms of the Rite at The Divine Lamp click here

9 June 2013, 10th Sunday in Ordinary Time C

Sál Ke Daurán Daswán Itwár (C)

Dákhilah (Entrance Antiphon): cf. (Zabúr) Psalm 26:1-2

Khudáwand merá núr aur merí naját hai. Mujhe kis ká ḍar hai?

Khudáwand merí zindagí ká hámí hai. Mujhe kis kí haibat hai?

Mere dushman mujh par chaṛh áte hain, to wuh ṭhokar kháte aur gir játe hain.

Jamá‘atí Du‘á (Collect):

Ai hamárí parwarish karne wále Khudáe karím

Sab achhí chízen tujh hí se átí hain

Ham minnat karne wálon ko apní faiyyází se yih bakhsh de

Ki ham un báton kí fikr men rahen jo durst aur rást hain

Aur terí hadáyat se in par ‘amal bhí karen

Masíh hamáre Khudáwand ke wasíle se jo tere sáth

Rúhu’l Quds kí wahdáníyat men Khudá hai

Aur hamesha se hamesha tak zinda rahtá aur sultanat kartá hai. Ámín.

Readings

Pahlí Tiláwat:

(Mulúk kí pahlí kitáb) 1 Kings 17:17-24

Dekh terá beṭá zinda hai.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

Zabúr: Psalm 29:2, 4-6, 11-13 Jamá‘ati jawáb áyat: 2

Jamá‘ati jawáb: Khudáwand terí ta‘ríf karúngá, tú ne mujhe chhuṛáyá hai.

Dusrí Tiláwat: (Muqaddas Paulus Rasúl Ká Khatt Galátíon ke nám) Galatians 1:11-19

Khudá ne apne Beṭe ko mujh men záhir kiyá, táki main us kí Injíl g̣hair qaumon ko sunáún.

Pák kalám ke paṛhe aur sune jáne par Khudá kí barkat ho.

Jamá‘at: Khudá ká shukr ho.

(Gospel Acclamation):

Hallelujah: cf. (Ifisíon) Ephesians 1:17, 18

Hallelujah, Hallelujah

Hamáre Khudáwand Yisú‘ Masíh ká Báp

Hamáre dil kí ánkhen raushan kare

Táki ham samajh len ki us ke buláwe kí hamen kyá ummed hai

Hallelujah

yá

Hallelujah: (Lúqá) Luke 7:16

Hallelujah, Hallelujah

Ek baṛá nabí ham men barpá húá hai,

Khudá ne apní ummat par nazar kí hai

Hallelujah

Injíl I Muqaddas:

(Muqaddas Lúqá ke mutábiq) Luke 7:11-17

Ai naujawán, main tujh se kahtá hún, uṭh.

Aur is ke ba‘d wuh ek shahr ko gayá jo Náín kahlátá hai, aur us ke shágird aur baṛá hujúm us ke sáth thá. Jab wuh us shahr ke pháṭak ke nazdík pahunchá, to dekho, ki ek murda báhar le jáyá já rahá thá jo apní mán ká iklautá beṭá thá, aur wuh bewa thí; aur shahr ke bahut log us ke sáth the. Use dekh kar Khudáwand ko tars áyá aur us se kahá: Na ro. Aur pás á kar janáza ko chhúá, aur uṭhánewále ṭhahir gaye. Tab us ne kahá: Ai naujawán main tujh se kahtá hún Uṭh. Aur wuh murda uṭh baiṭhá, aur bolne lagá. Aur us ne use us kí mán ko saunp diyá.

Tab sab par khauf chhá gayá, aur Khudá kí tamjíd kar ke kahne lage, ki ek baṛá nabí ham men barpá húá hai, aur ki Khudá ne apní ummat par nazar kí hai. Aur us kí bábat yih khabar sáre Yahúdiya aur tamám ás pás ke ‘iláqah men phail gayí.

Injíl I Muqaddas ke wasíle se hamárí khatáen mu‘áf kí jáen.

Jamá‘at: Ai Masíh, terí sitáish ho.

Nazránon par Du‘á (Prayer over the Offerings)

Ai Khudáwand hamáre Khudá

Apne karam se ham ‘ájizon kí khidmat par nazar kar

Ki ham kamzoron ká yih nazrána

Tujhe maqbúl aur hamáre liye saháre ká bá‘is ho

Masíh hamáre Khudáwand ke wasíle se. Ámín.

Pák Sharákat kí áyat (Communion Antiphon): (Zabúr) Psalm 17:3

Ai Khudáwand, tú merí chaṭán hai jahán main panáh letá hún

Ai mere Khudá tú mujhe khalásí dene wálá hai, jo merí madad kartá hai.

Yá

(1Yúhanná) 1 John 4:16

Khudá muhabbat hai aur jo muhabbat men qáim rahtá hai, aur Khudá us men rahtá hai.

Pák Sharákat ke ba‘d kí Du‘á (Prayer after Communion)

Ai Khudáwand hamáre Khudá

Shifá bakhshná terá kám hai

Pas apní shafqat se

Hamen burí kháhishon se bachá

Aur hamárí ráhbarí kar ke

Hamen neko kárí kí taraf le já

Masíh hamáre Khudáwand ke wasíle se. Ámín.

…

Podcast:

For Sermon by Fr. Robert Barron click here

For reflection by Dr. Scott Hahn click here

Some great resources for Sunday Mass, Ordinary and Extraordinary Forms of the Rite at The Divine Lamp click here